Donald Trump ka deklaruar se Irani do të rikthehet në tryezën e negociatave dhe të pranojë “gjithçka që kërkon” SHBA. Në një intervistë për Fox News, ai tha se negociatorët amerikanë kishin arritur pothuajse çdo pikë të kërkuar, përveç refuzimit të Iranit për të hequr dorë nga ambiciet bërthamore. Sipas Trump, Teherani nuk e ka braktisur procesin dhe ai parashikon një rikthim të shpejtë në bisedime. Në të njëjtën intervistë, ai paralajmëroi edhe Kinën me tarifa deri në 50% nëse ndihmon ushtrinë iraniane, ndërsa shtoi se çmimet e naftës dhe gazit pritet të bien pas konfliktit. Nga ana tjetër, Forcat Detare të Gardës Revolucionare Islamike të Iranit paralajmëruan se çdo anije ushtarake që i afrohet Ngushticës së Hormuzit do të konsiderohet shkelje e armëpushimit dhe do të përballet me pasoja e reagim të ashpër. Në një deklaratë zyrtare, Irani thekson se Ngushtica e Hormuzit mbetet e hapur për kalimin e lirë të anijeve jo-ushtarake, nën kontroll dhe rregulla të caktuara.