Qeveria izraelite ka zgjedhur të mos reagojë publikisht ndaj dështimit të bisedimeve mes SHBA-së dhe Iranit në Islamabad, ndërsa kryeministri Benjamin Netanyahu ka qenë kundër këtyre negociatave që në fillim. Sipas raportimeve, Netanyahu ka preferuar vijimin e sulmeve ndaj Iranit dhe më herët është detyruar të mohojë lajmet se ishte informuar në momentet e fundit për një armëpushim të përkohshëm të dakordësuar nga presidenti amerikan Donald Trump. Ndërkohë, mediat izraelite bëjnë të ditur se Shefi i Shtabit të IDF-së, ka urdhëruar ushtrinë të kalojë në një nivel të lartë gatishmërie, i ngjashëm me periudhat para operacioneve të mëparshme ushtarake. Edhe pse nuk ka ende konfirmim zyrtar, deklaratat përputhen me qëndrimet e Netanyahut, i cili ka theksuar se “lufta nuk ka mbaruar”. Paralelisht, ushtria izraelite vijon bombardimet në Liban, duke pretenduar se po godet objektiva të Hezbollahut. Sipas autoriteteve libaneze, në javët e fundit janë vrarë mbi 2 mijë persona, ndërsa vetëm një ditë janë raportuar mbi 350 viktima, mes tyre edhe gra dhe fëmijë.