Presidenti i Shteteve të Bashkuara të Amerikës, Donald Trump, reagoi ashpër pas dështimit të negociatave mes Uashingtonit dhe Teheranit, që u zhvilluan në Pakistan. Kreu i Shtëpisë së Bardhë njoftoi se ka urdhëruar marinën amerikane të nisë menjëherë bllokimin e Ngushticës së Hormuzit dhe të pengojë çdo anije në ujërat ndërkombëtare që i kanë pagur taksë Iranit. Udhëheqësi amerikan tha se bisedimet në Islamabad shkuan mirë dhe “për shumicën e çështjeve pati pajtim”, por shtoi se dy palët nuk janë pajtuar për programin bërthamor të Iranit. “Takimi shkoi mirë, shumica e pikave u ranë dakord, por e vetmja pikë që kishte vërtet rëndësi, Armët BËRTHAMORE, nuk u arrit. Me efekt të menjëhershëm, Marina e Shteteve të Bashkuara do të fillojë procesin e BLLLOKIMIT të çdo anijeje që përpiqet të hyjë ose të dalë nga Ngushtica e Hormuzit. Unë kam udhëzuar gjithashtu Marinën tonë të kërkojë dhe të ndalojë çdo anije në ujërat ndërkombëtare që ka paguar një tarifë ndaj Iranit. Askush që paguan një tarifë të paligjshme nuk do të ketë kalim të sigurt në det të hapur. Ne gjithashtu do të fillojmë të shkatërrojmë minat që iranianët kanë vendosur në ngushticë”.