Rusia ka vazhduar bombardimet vdekjeprurëse mbi qytetet ukrainase, duke vrarë të paktën tre persona në rajonin e Harkivit gjatë natës, thanë zyrtarët lokalë. Sulmet u kryen ndërsa presidenti i Ukrainës, Volodymyr Zelensky, ishte drejtuar për në Paris, në kuadër të një turneu në kryeqytetet evropiane në kërkim të më shumë mbështetjeje. Shërbimet e Emergjencës së Ukrainës raportuan se tre persona u vranë dhe të paktën 13 të tjerë u plagosën, përfshirë katër fëmijë, nga një sulm rus në qytetin lindor Balaklia, një nyje e rëndësishme hekurudhore në rajonin e Harkivit. Kreu i administratës ushtarake atje, tha se sulmi goditi qendrën e qytetit dhe plagosi të paktën tre fëmijë. Nëntë persona u shtruan në spital, ndërsa ekipet e emergjencës ndodheshin në vendngjarje. Balaklia u pushtua nga forcat ruse menjëherë pasi Moska nisi pushtimin e plotë të Ukrainës në shkurt të viti 2022, por u rimor nga forcat ukrainase disa muaj më vonë. Rusia i ka shtuar sulmet ndaj objekteve energjetike ukrainase me afrimin e muajve të dimrit, duke ngjallur frikë për mungesë të energjisë elektrike gjatë motit të ftohtë. Moska ka goditur gjithashtu rregullisht zonat civile ukrainase, megjithëse e mohon se shënjestron objekte të tilla. Ndërkohë, Zelensky ka nisur një udhëtim në kryeqytete e rëndësishme evropiane në përpjekje për të siguruar furnizim me energji dhe armë për Ukrainën, e cila po përballet me ofensiva të vazhdueshme ajrore dhe tokësore nga Rusia. Zelensky pritet të mbërrijë në Paris sot, për t’u takuar me presidentin francez, Emmanuel Macron, një mbështetës i fuqishëm i Ukrainës. Takimi i parë mes tyre pritet të zhvillohet në bazën ajrore Villacoublay jashtë kryeqytetit.