Zbardhet një vrasje e ndodhur një vit më parë në Selanik. Policia e Shtetit ka ndërmarrë operacionin e koduar "Radaneci 2021". Në këtë mënyrë është dokumentuar me prova ligjore autorësia edhe e dy bashkëpuntorëve të tjerë të ngjarjes së ndodhur 1 vit më parë në Selanik, ku mbeti i vrarë një 43-vjeçar nga Korça. Për këtë ngjarje është arrestuar më parë nga autoritetet policore greke, shtetasi Romario Tahiri. Operacioni i kryer nga strukturat policore të Drejtorisë Vendore të Policisë së Korçës, me mbështetjen e Drejtorisë së Përgjithshme të Policisë së Shtetit, nën drejtimin e Prokurorisë së Rrethit Gjyqësor Korçë ka bërë të mundur vënien në pranga 2 nga autorët e dyshuar të ngjarjes. Në vijim të hetimeve disamujore të kryera për dokumentimin me prova ligjore të ngjarjes së ndodhur më datë 18 maj të vitit të kaluar, ku pas një konflikti të çastit mbeti i vrarë një 43-vjeçar nga Korça, finalizuan operacionin policor si rezultat i të cilit u bë kapja dhe ndalimi i shtetasve Orgel Xhambazi dhe Medi Ganolli. Gjykata e Korçës ka caktuar ndaj tyre masën e sigurisë "Arrest në burg" për veprën penale "Vrasja me dashje" e kryer në bashkëpunim.