Prokurorët gjermanë njoftuan se një shtetas ukrainas është arrestuar në Itali, i dyshuar si një nga personat që organizuan në 2022-shin shpërthimet nënujore në vitin 2022, të cilat i shkaktuan dëme të mëdha tubacioneve të Nord Stream midis Rusisë dhe Gjermanisë. I dyshuari, i identifikuar vetëm si Serhii K. u prangos në afërsi të qytetit italian të Riminit. Ai besohet të jetë pjesë e një grupi që vendosi eksplozivë nën tubacionet Nord Stream 1 dhe Nord Stream 2, duke ndërprerë kështu një burim kyç të gazit natyror për Europën, pikërisht në kohën kur liderët e saj po përballeshin me një krizë energjitike të shkaktuar nga lufta e Rusisë në Ukrainë. Askush nuk e mori përgjegjësinë e asaj ngjarjeje, dhe Ukraina vetë ka mohuar cdo përfshirje. Hetuesit kanë qenë kryesisht të heshtur për ecurinë e verifikimeve të tyre, megjithatë pohojnë se dy vjet më parë gjetën gjurmë eksplozivësh nënujorë në kampionet e marra nga një jaht që u kontrollua si pjesë e hetimit. Serhii K., që vec shkaktimit të shpërthimeve përballet dhe me akuzat e sabotimit dhe shkatërrimit të strukturave, u ndalua me një urdhër arresti europian që u lëshua të hënën. I dyshuari dhe të tjerët përdorën një jaht që u nis nga porti gjerman i Rostockut, i cili ishte marrë me qira nga një kompani gjermane duke përdorur dokumente identifikimi të falsifikuara dhe me ndihmën e ndërmjetësve, thanë prokurorët. Ata nuk dhanë asnjë informacion mbi personat e tjerë në bordin e jahtit dhe as nuk thanë asgjë rreth asaj se kush tjetër mund të ketë qenë i përfshirë në koordinimin e sabotimit të dyshuar, ose rreth një motivi të mundshëm.