Presidenti kinez Xi Jinping premtoi se do të punojë me administratën e ardhshme amerikane të Donald Trump, ndërsa zhvilloi bisedimet e tij të fundit me presidentin në largim Joe Biden, ku u diskutua mbi tema që varionin nga krimi kibernetik tek tregtia, e për konfliktet e tensionet nga Tajvani, Deti i Kinës Jugore dhe Rusia. Biden u takua me Xi Jinping për rreth dy orë në një hotel ku lideri kinez po qëndronte, në margjinat e forumit të Bashkëpunimit Ekonomik Azi-Paqësor në Lima të Perusë, për bisedimet e tyre të para në shtatë muaj. "Qëllimi i Kinës për një marrëdhënie të qëndrueshme dhe të shëndetshme Kinë-SHBA mbetet i pandryshuar" pas zgjedhjes së Trump, tha Xi ndërsa takoi Biden, duke pranuar "uljet dhe ngritjet" midis vendeve. “Kina është e gatshme të punojë me administratën e re të SHBA-së për të ruajtur komunikimin, për të zgjeruar bashkëpunimin dhe për të menaxhuar dallimet” – tha ai. Biden i tha presidentit kinez se të dy udhëheqësit nuk kanë rënë gjithmonë dakord, por diskutimet e tyre kanë qenë "të sinqerta" dhe "të hapura". Dy muaj para se Trump të kthehet në Shtëpinë e Bardhë, zyrtarët amerikanë shohin rreziqe të shtuara të një përplasjeje em Kinën gjatë tranzicionit. Presidenti i zgjedhur është zotuar të miratojë tarifa totale prej 60% për importet amerikane të mallrave kineze, si pjesë e një pakete masash tregtare në kuadër të politikës "America e Para". Pekini i kundërshton këto hapa. Republikani gjithashtu ka në plan të punësojë disa zëra të ashpër ndaj Kinës në role të larta, duke përfshirë senatorin amerikan Marco Rubio si sekretar shteti dhe përfaqësuesin Mike Ëaltz si këshilltar për sigurinë kombëtare. Biden ka tentuar të ulë tensionet me Kinën por ka patur pak shenja përparimi për cështjet kryesore. Por Biden dhe Xi ranë dakord që qeniet njerëzore, jo inteligjenca artificiale, duhet të marrin vendimet për përdorimin e armëve bërthamore, hera e parë që vendet e diskutojnë këtë çështje. Presidentët e SHBA-së dhe Kinës folën gjithashtu për Korenë e Veriut, një aleate e Kinës, thellimi i lidhjeve të së cilës me Rusinë dhe vendosja e trupave në luftën e Moskës me Ukrainën kanë ngritur shqetësime në Uashington, Pekin dhe kryeqytetet e tjera evropiane.