Presidenti i Serbisë, Aleksandar Vuçic vazhdon të japë sinjale që tregojnë se presionet mbi Beogradin për të njohur Kosovën janë të mëdha, e do të vijnë duke u shtuar. Pas një takimi të Partisë së tij Përparimtare Serbe, Vuçic tha se Serbinë e pret një “periudhë e vështirë”, gjatë së cilës do t’iu ekspozohet “të gjitha presioneve, fushatave dhe të pavërtetave të mundshme”. “Është e rëndësishme të kuptohet pesha e pozitës në të cilën jemi sidomos tani, pas ndryshimit në administratën amerikane. Duhet të pritet presion i përqendruar i BE-së dhe SHBA-së mbi Serbinë, për të përmbushur kërkesat për njohjen e Kosovës siç e thonë hapur amerikanët, ndërsa, BE-ja do të përdorë një fjalor pak më ndryshe, por do të shkojë drejt të njëjtit qëllim”, tha Vuçic. Kreu I shtetit serb shpjegoi se në takimin e partisë së tij u fol edhe për vizitën që do të realizojë javën e ardhshme përfaqësuesi i posaçëm i Bashkimit Evropian në dialogun Kosovë-Serbi, Mirosllav Lajçak.“Do të flasim për atë që Serbia mund të bëjë, për atë që nuk mund të bëjë, për atë që dëshiron dhe për atë që nuk na shkon në mend me asnjë kusht”, tha Vuçic. Ai po ashtu njoftoi se, në ditët në vijim, do të mbahet një takim në qytetin serb të Kurshumlisë me përfaqësuesit e serbëve nga Kosova, ndersa shtoi se Lista Serbe ka arritur “dominim absolut” në mesin e serbëve në veri të Kosovës.