Aleksandër Vuçiç po blen heshtjen e perëndimit ndaj autokracisë që ka vendosur në Serbi përmes lëshimeve që po bën në Kosovë. Në këtë përfundim kanë arritur mediat dhe analistët opozitarë serbë, duke analizuar qëndrimet e Presidentit serb sa i takon situatës në veri të Kosovës. Ekspertët kanë analizuar planin me pesë pika që Aleksandër Vuçiç prezantoi ditën e premte në një dalje për mediat që u konsiderua urgjente. Njëra prej pikave është ajo e rikthimit të gjendja e mëparshme. Kjo do të thotë te rikthimi i serbëve në institucionet e Kosovës, përfshirë këtu në policinë dhe sistemin e drejtësisë së Kosovës, aty ku dy vite më parë ishte po Aleksandër Vuçiç që u kërkoi të braktisin e bojkotojnë këto institucione pasi Kosova nisi të zbatojë planin e heqjes nga qarkullimi të automjeteve me targa të Serbisë. Për këtë arsye, analistët e pavarur serbë besojnë se plani i Vuçiç për serbët e veriut të Kosovës është thjesht për konsum politik të brendshëm, pasi për jashtë Serbisë, sipas tyre, ai po e shet Kosovën në këmbim të heshtjes së Perëndimit përballë autokracisë dhe dyshimeve për lidhje me krimin.