Hetimet për zbardhjen e plotë të rrethanave të ngjarjes së rëndë të mbrëmjes së të enjtes, ku u ekzekutua me armë zjarri 61-vjeçari Piro Prroni vijojnë nga ana e autoriteteve. Autori i dyshuar, 58-vjeçari Ndoc Maçaj u vetëdorëzua disa orë pas ngjarjes, duke dorëzuar edhe armën e krimit. Nga deklarimet e tij, konflikti nisi pas një debati në pronën e tyre. Sipas dëshmisë së Maçajt, viktima tentoi ta godiste me kosë, ndërsa ai qëlloi fillimisht në ajër dhe më pas e vrau, duke pretenduar se veproi për vetëmbrojtje. Policia ka sekuestruar në vendngjarje 2 gëzhoja pistolete dhe 2 mjete prerëse një thikë dhe një kosë. Hetimet po vijojnë për dokumentimin e plotë të kësaj ngjarjeje të rëndë. Mbi autorin rëndojnë veprat penale “Vrasja me dashje” dhe “Mbajtja pa leje dhe prodhimi i armëve, armëve shpërthyese dhe i municionit”.