Ndërsa Donald Trump përpiqet të mbyllë luftën në Iran, fqinji ishullor i Amerikës mund të jetë i radhës për t'u përballur me zemërimin e presidentit amerikan. Kuba dhe Amerika janë përballur për dekada të tëra por ekspertët thonë se të gjitha kushtet janë plotësuar që SHBA të ndërhyjë dhe ta rrëzojë regjimin një herë e përgjithmonë. Që nga revolucioni komunist 67 vjet më parë, Havana dhe Uashingtoni janë përballur me tensione pothuajse të nivelit të Armagedonit, rasti më i njohur është Kriza e Raketave të vitit 1962, dhe kanë mbetur në pozicione armiqësore shumë kohë pas përfundimit të Luftës së Ftohtë. Pas viteve të katastrofës ekonomike, korrupsionit dhe embargove, Kuba është zhytur në situatën më të rëndë që ka parë në dekada. Kubanët e zakonshëm po mbajnë barrën e standardeve të jetesës në rënie duke iu nënshtruar racionimit, ndërprerjeve të energjisë, mungesës së gazit, spitaleve të paralizuara dhe transportit publik të varfër. Shumë nga kushtet që do të nxisnin veprimin e SHBA-së në Kubë tani janë plotësuar. Gjithcka që i mbetet Trumpit të bëjë është të tërheqë këmbëzën, thonë ekspertët. Rrethanat e mjerueshme ekonomike e kanë rënduar vendin për vite me radhë, por janë përkeqësuar për shkak të një embargoje të fundit të naftës.