Ministria e Mbrojtjes e Ukrainës ka njoftuar të shtunën se një tjetër gjeneral rus, Yakov Rezantsev, u vra në një sulm në afërsi të qytetit të Khersonit. Rezantsev ishte komandanti i ushtrisë së kombinuar të 49-të të Rusisë. Një zyrtar perëndimor tha se ai është gjenerali i shtatë që vdiq në Ukrainë, dhe oficeri më i lartë që ka humbur jëtën në luftime. Mendohet se morali i ulët mes trupave ruse i ka detyruar oficerët e lartë të afrohen në vijën e frontit. Në një bisedë të përgjuar nga ushtria ukrainase, një ushtar rus u ankua se Rezantsev kishte pretenduar se lufta do të përfundonte brenda disa orësh, vetëm katër ditë pasi kishte filluar. Mediat ukrainase raportuan të premten se gjenerali u vra në bazën ajrore Chornobaivka pranë Khersonit, të cilën Rusia po e përdor si post komandimi dhe është sulmuar disa herë nga ushtria ukrainase. Një tjetër general, Andrei Mordvichev, thuhet se u vra nga një sulm ukrainas në të njëjtën bazë. Kherson ishte qyteti i parë ukrainas që u pushtua nga forcat ruse, megjithëse ka raporte se atje mbahen protesta të përditshme kundër pushtimit rus.