Dy ushtarë dhe një përkthyes civil amerikan u vranë në Sirinë qendrore, pasi një anëtar ekstremist i forcave të sigurisë siriane hapi zjarr ndaj një patrulle të përbashkët amerikano-siriane. “Dy anëtarë të shërbimit amerikan dhe një civil amerikan u vranë, dhe tre anëtarë të shërbimit u plagosën, si pasojë e një prite nga një person i armatosur i vetëm i ISIS-it në Siri. Personi i armatosur u qëllua dhe u vra”, njoftoi Komanda Qendrore e SHBA-së. Një zëdhënës i ministrisë së brendshme sqaroi se autori nuk kishte një rol udhëheqës në forcat e sigurisë. Presidenti Donald Trump reagoi duke thwnw se Amerika wshtw nw zi për “humbjen e tre Patriotëve të Mëdhenj” dhe u zotua të hakmerret. “Ky ishte një sulm i ISIS-it kundër SHBA-së dhe Sirisë, në një pjesë shumë të rrezikshme të Sirisë, që nuk kontrollohet plotësisht prej tyre”, shkroi Trump në platformën e tij Truth Social. Ky konsiderohet si incidenti i parë i këtij lloji që nga momenti kur një koalicion islamist mori pushtetin në Siri një vit më parë, duke rrëzuar regjimin e Bashar al-Assadit. Muajin e kaluar, gjatë vizitës në Uashington të presidentit të përkohshëm sirian Ahmad al-Sharaa, Siria iu bashkua zyrtarisht koalicionit ndërkombëtar kundër ISIS-it.