Kuvendi i Shqipërisë me votat e mazhorancës ka rrëzuar këtë të enjte në seancë plenare dy dekretet e Presidentit Ilir Meta për ligjin e shërbimeve të pagesave dhe shtesën e kontratës së koncensionit në Porto-Romano. Nga ana tjetër deputetët kanë miratuar dy ligje të rëndësishme që është ai i policisë së burgjeve dhe për shërbimin e provës, por është marrë dhe vendimi për përfundimin e gjendjes së fatkeqësisë natyrore. Me miratimin nga Kuvendi të projektligjit për policinë e burgjeve, efektivët e burgjeve do të paguhen njëlloj me ata të policisë së rendit. Konkretisht përfitimet e policëve të burgjeve me hyrjen në fuqi të ligjit do të jenë rritja e pagës për grade, ccka ka efekt të menjëhershëm, ndërsa dy përfitimet e tjera vijnë me fillimin e vitit të ri. Kështu shtesa për vjetërsi pune dhe shtesa për natyrë të veçantë pune do të fillojë efektet më 1 janar 2022.