Para zgjedhjeve parlamentare të 2017-s, në një nga replikat me Taulant Ballën në parlament, Sali Berisha u kërkonte socialistëve që të miratonin propozimin e Partisë Demokratike për votim elektronik. Berisha sfidonte mazhorancën duke e akuzuar se i trembej votës elektronike të shqiptarëve, që sipas tij do të largonte Edi Ramën. Gjashtë vite më vonë dhe kur votimi elektronik është testuar në tre palë zgjedhje dhe vlerësuar në raportin paraprak të OSBE/ODIHR, Sali Berisha ka ndryshuar qëndrim. Ish-Kryeministri ka dorëzuar në emër të koalicionit Bashkë Fitojmë në Komisionin Qendror të Zgjedhjeve kërkesën për anulim të votimit elektronik në Bashkinë e Kamzës dhe ripërsëritje të procesit, por me votim tradicional me fletë.