Mot i qëndrueshëm, pa shi, por i acartë. Ky është parashikimi i meteorologëve për javën në vijim. Sipas Meteoalb, në vendin tonë do të mbizotërojnë alternime kthjellimesh dhe vranësirash që do të sjellin mot të qëndrueshëm, por temperaturat, duke nisur nga kjo e dielë do të shënojnë rënie. Kështu, mërkuri në termometër do të zbresë deri në -7 gradë celcius në zonat malore, o deri në 8 gradë celcius në zonat e ulëta dhe 2 deri në 11 gradë celcius në zonat bregdetare. Era do të fryjë në drejtim të verilindjes ndërsa dallgët në det do të jenë mbi 4 ballë. Të gjithë rajonin e ballkanit e pret në fakt një javë e ftohtë, me temperatura të ulëta dhe reshje të dendura bore. Një ciklon i fuqishëm gjendet mbi Detin Egje dhe ai po kushtëzon reshje bore në turqi ndërkohë që vecanërisht të martën dhe të mërkurën, në rajonin tonë, temperaturat do të ulen ndjeshëm, por reshjet do të jenë të karakterit lokal dhe sporadike. Fundi i javës ndërkohë do të shohë mesdheun dhe italinë të përballen me erëra jugore, që do të sjellin edhe një rritje të temperaturave. Shiu mund të rikthehet po ashtu në fundin e javës së ardhshme, duke rënduar sërish situatën, pas disa ditësh clirim nga përmbytjet dhe reshjet intensive që kemi parë javën e kaluar. Sidoqoftë, meteorologët thonë se rritja e temperaturave që pritet në fund të javës së ardhshme, me shumë gjasa nuk do të zgjasë shumë dhe i ftohti do të kthehet sërish.