Një tjetër qytetar hero u përpoq të ndalonte një nga sulmuesit në masakrën e plazhit Bondi në Sydney por fatkeqësisht u qëllua për vdekje. Emri i tij ishte Boris Gurman, 69 vjeç. Gruaja e tij, Sofia, 61 vjeç, ndërhyri gjithashtu dhe humbi jetën bashkë me të. Sipas Sydney Morning Herald, çifti ishte i pari nga 15 viktimat e sulmit. Boris dhe Sofia, banorë hebrenj të Bondit, duhej të festonin 35-vjetorin e martesës në janar, raporton BBC. Një video e fundit, tregon Gurman, një mekanik në pension, duke u përleshur me një nga sulmuesit dhe duke i marrë armën, përpara se të dy të bien në tokë. Ai më pas ngrihet dhe duket se e godet sulmuesin me pushkë. Besohet se sulmuesi më pas ka rrëmbyer një armë tjetër zjarri, të cilën e përdori për të vrarë atë dhe gruan e tij. "Ndërsa asgjë nuk mund ta lehtësojë dhimbjen e humbjes së Borisit dhe Sofias, ne ndiejmë krenari të jashtëzakonshme për guximin dhe vetëmohimin e tyre", tha familja. "Kjo tregon qartë se kush ishin ata: njerëz që instiktivisht dhe me vetëmohim kërkonin të ndihmonin të tjerët". Gruaja që ka publikuar videon e regjistruar nga kamera në makinën e saj, tha se Gurman, nuk kishte vrapuar për tu larguar, por ishte hedhur drejt rrezikut, duke përdorur të gjithë forcën e tij për të rrëmbyer armën dhe të luftonte deri në vdekje". Një person tjetër që tha se kishte qenë dëshmitar i ngjarjes i tha agjencisë australiane të lajmeve 9Neës: "Ai ishte një hero. Ai u përpoq ta ndalonte që në fillim, para se të nisnin të shtënat në plazh. Ai e vuri veten në rrezik”.