Dy cisterna u dogjën në ujërat irakiane të enjten pas asaj që dukej të ishte sulm iranian, vala e fundit e sulmeve ndaj objekteve të naftës dhe transportit në të gjithë Lindjen e Mesme, ndërsa Irani paralajmëroi se bota duhet të jetë gati që nafta të arrijë 200 dollarë për fuçi. E nisur me sulme ajrore të përbashkëta të SHBA-së dhe Izraelit ndaj Iranit pothuajse dy javë më parë, lufta deri më tani ka vrarë rreth 2,000 njerëz dhe ka zhytur tregjet globale të energjisë dhe transportin në kaos. Konflikti është përhapur në të gjithë Lindjen e Mesme dhe ka nxitur plane për një lirim rekord të rezervave strategjike të naftës për të zbutur një nga krizat më të rënda të karburantit që nga vitet 1970. Në një tubim në Kentucky, Donald Trump tha se Shtetet e Bashkuara e kishin fituar luftën, por nuk donin të ktheheshin çdo dy vjet te Irani. "Nuk duam të tërhiqemi më herët se c’duhet, apo jo?" tha ai të mërkurën. "Duhet ta përfundojmë punën." Irani e ka bërë të qartë se synon të imponojë një tronditje të zgjatur ekonomike, me zëdhënësin e komandës ushtarake të Iranit që tha në paralajmërime drejtuar SHBA-së të mërkurën: "Përgatituni që nafta të arrijë në 200 dollarë për fuçi, sepse çmimi i naftës varet nga siguria rajonale, të cilën ju e keni destabilizuar." Çmimet e naftës, të cilat u rritën më herët gjatë javës në gati 120 dollarë për fuçi para se të uleshin sërish, qëndruan në mbi 100 dollarë për fuçi në bursat aziatike të enjten mes frikës së përtërirë për ndërprerje të furnizimit. Indekset kryesore të aksioneve të Ëall Street ranë dhe aksionet në Azi ndoqën të njëjtin shembull. Barka iraniane të mbushura me eksplozivë duket se u përplasën mbi dy cisterna karburanti në ujërat irakiane duke i vënë flakën dhe duke vrarë një anëtar të ekuipazhit pasi më herët raketat goditën tre anije tregtare në ujërat e Gjirit.