Miroslav Lajçak do të udhëheqë procesin e ndërmjetësimit të dialogut mes Kosovës dhe Serbisë të paktën deri më 31 janar të vitit 2025. Këshilli Europian ka vendosur zgjatjen e mandatit të diplomatit sllovak, që parashikohej të largohej nga ky pozicion vjeshtën e këtij viti për të marrë detyrën e Ambasadorit të BE-së në Zvicër. Vendimi surprizë është marrë këtë të premte nga Këshilli. Lajçak u emërua ndërmjetësues i dialogut në fillim të prillit të vitit 2020. Prej asaj kohe ai është angazhuar në bisedimet mes Kosovës dhe Serbisë në kuadër të procesit të lehtësuar nga Brukseli. Por, zgjedhjet vendore të majit të vitit të kaluar në katër komunat serbe në veri të Kosovës dhe sulmi terrorist i Milan Radoiçiç në Banjskë në shtator po të vitit të kaluar ashpërsuan tensionet mes Prishtinës dhe Beogradit, teksa Lajçak dështoi të qetësojë palët. Jo vetëm kaq, por diplomati sllovak është akuzuar edhe për njëanshmëri në këto diskutime, duke favorizuar palën serbe në dialog, përmes paraqitjes së draft-marrëveshjeve shpesh të ngjashme me propozimet e Beogradit.