Që nga breshëria e kërcënimeve të Presidentit amerikan Donald Trump për të pushtuar Grenlandën, autoritetet në ishull kanë kërkuar ndihmë nga një aleat verior, Kanadaja. Një njësi rezervë e forcave të armatosura kanadeze e quajtur Rangers ka patur prej kohësh një prani gjatë gjithë vitit në komunitetet kryesisht të paarritshme të Arktikut. Për tre vjet, autoritetet në Grenlandë dhe Danimarkë janë konsultuar me zyrtarët kanadezë se si të krijojnë versionin e tyre të Rangers-ave, bisedime që u bënë më urgjente nën kërcënimet e Trump dhe frikën në rritje të armiqësisë ruse në Arktik. "Retorika që del nga Shtëpia e Bardhë ka përshpejtuar përpjekjet për të hedhur poshtë idenë se komunitetet e Arktikut kanë nevojë që SHBA-të të ndërhyjnë dhe t'i shpëtojnë ato", thotë Ëhitney Lackenbauer, një nënkolonel Kanadez i përfshirë në bisedime. "Vendet nordike dhe Kanadaja, po e kuptojnë gjithnjë e më shumë se mund të bashkohemi në mënyra ushtarake dhe diplomatike për të dërguar një mesazh që mbart peshë morale", shton ai. Ndërsa Kanadaja përpiqet të heqë dorë nga mbështetja te SHBA-ja për të mbrojtur Arktikun e saj të gjerë, Kryeministri Mark Carney po forcon lidhjet dhe po shkëmben këshilla sigurie me vendet nordike, të cilat ai i përshkruan si partnerë të besuar. Bashkëpunimi i shtuar i mbrojtjes i Kanadasë me vendet nordike është pjesë e përpjekjeve të Carneyt për të forcuar aleancat midis atyre që ai i quan "fuqi të mesme" në një botë ku Shtetet e Bashkuara konsiderohen një partner më pak i besueshëm. Ndërsa Carney thotë se Kanadaja nuk do të mbështetet më te asnjë komb tjetër për të mbrojtur territorin e vet, ai vlerëson se kërcënimi më i madh i Arktikut vjen nga Rusia.