Prokuroria e Posaçme Antikorrupsion nuk ka dhënë aprovim për kërkesën e Këshillit Bashkiak që Erion Veliaj të marrë pjesë fizikisht në mbledhjen që do të mbahet më 21 nëntor ku do të diskutohet projekti i buxhetit bashkiak të vitit të ardhshëm. Në kushtet kur, Gjykata Kushtetuese e riktheu në detyrë si kryetar të bashkisë së Tiranës, Erion Veliajn, 22 këshilltarët socialistë argumentojnë se pjesëmarrja e tij në këtë mbledhje është një e drejtë funksionale e garantuar me ligj dhe është e nevojshme për prezantimin e draftit, buxhetit, raportimeve vjetore dhe çështjeve të administrimit të njësive të vetëqeverisjes vendore. Për këtë arsye, këshilltarët e majtë kërkuan nga Prokuroria e Posaçme që kryetari i bashkisë së Tiranës, Erion Veliaj të lejohej përkohësisht të largohet nga qelitë e paraburgimit për të qenë prezent fizikisht në mbledhjen e këshillit bashkiak apo nëpërmjet një modaliteti të përkohshëm komunikimi, online apo me videokonferencë. Për aq kohë sa në këshill bashkiak diskutohet ligji më i rëndësishëm financiar për bashkinë më të madhe në vend, ky diskutim nuk mund të bëhet pa pasur prezent drejtuesin e kësaj bashkie. Megjithatë, për Prokurorinë e Posaçme Antikorrupsion këto argumente nuk kanë qënë të mjaftueshme që Veliaj të lerë qelinë përkohësisht apo të lidhet online me punimet e këshillit bashkiak.