Edhe pse kryeministri Edi Rama u kujdes të mos e bënte publik emrin e shtetit nga erdhën 975 vaksinat e para të Pfizer, mediat kanë arritur të zbulojnë vendin prej nga u nisën ato drejt Shqipërisë. Sipas dokumenteve të publikuara dhe të marra nga dogana e Rinasit ku është bërë zhdoganimi, vaksinat që nisën të injektohen të hënën në stadiumin “Air Albania” kanë ardhur po dje nga Gjermania dhe janë të kompanisë Pfizer. Por dokumentat e publikura nuk konfirmojnë faktin që edhe pse kanë mbërrritur në Shqipëri nga Gjermania, të jetë ky shteti që i ka dhuruar. Sipas dokumentave të zhdoganimit flakonet me vaksinën Pfizer janë prodhuar në Gjermani. Ndërsa pjesa tjetër e produkteve shoqëruese të vaksinave, shiringat, aget dhe substancat kanë adresën e shtetit fqinjë, Itali. Vaksina ka mbërritur në Rinas vetëm dje në mesditë dhe është tërhequr dorazi nga një kompani shqiptare që më pas ia ka dorëzuar autoriteteve shqiptare. Procesi i vaksinimit në Shqipëri nisi menjëherë pas mbërritjtes së dozave të para dhe ata që po vaksinohen janë stafet mjekësore nga spitalet covid.