Pas vakancës së shpallur nga Kuvendi dhe presidenti i vendit, Këshilli i Lartë Gjyqësor, u ka bërë thirrje gjyqtareve me integritet dhe cilësi të larta etiko-profesionale të kandidojnë për pozicionet e lira. Përmes një njoftimi për media KLGJ shprehet se e ben këtë thirrje për gjyqtarët nisur nga fakti se e vlerëson Gjykatën Kushtetuese si organin kryesor për garantimin e respektimit të parimeve të kontrollit dhe balancimit të pushteteve, sigurimin e kushtetutshmërisë në vendimmarrje dhe sundimin e ligjit në vend. “Këshilli i Lartë Gjyqësor, i vetëdijshëm për rëndësinë që ka rifunksionalizimi i plotë i Gjykatës Kushtetuese për forcimin e shtetit të së drejtës, për garantimin e të drejtave dhe lirive themelore të njeriut dhe për procesin e integrimit të Shqipërisë në Bashkimin Evropian, inkurajon gjyqtarët që përmbushin kriteret formale ligjore dhe që kanë kaluar me sukses procesin e rivlerësimit kalimtar duke u konfirmuar në detyrë, të kandidojnë për pozicionet e lira për gjyqtar në Gjykatën Kushtetuese”, thuhet në njoftimin e KLGJ-së. Ndërkaq ambasadorja amerikane në Tiranë, Yuri Kim ka vlerësuar thirrjen e KLGJ-së për aplikimet e gjyqtarëve duker pohuar se është veprimi i duhur që mbështet sigurinë e karrierës për gjykatësit që kanë kaluar vetingun të cilët do aplikojnë në dy vendet vakante në Gjykatën Kushtetuese” . Sipas Yuri Kim SHBA shpreson që kjo nismë do të nxisë më shumë gjykatës që t’i përgjigjen thirrjes së detyrës. “Shqipëria ka nevojë për ju” e mbyll reagimin e saj Yuri Kim.