Jevgeni prigozhin, shef i grupit të mercenarëve Vagner pretendoi se njerëzit e tij janë luftëtarët më të fortë por edhe pranoi se ushtria ukrainase ka bërë një luftë të fortë, vecanërisht në qytetin lindor të Bakhmutit. Në një intervistë për një bloger rus pro moskës, Prigozhin tha se ukrainasit janë shumë të organizuar, shumë të trajnuar dhe se inteligjenca e tyre është në nivelin më të lartë të mundshëm. Ata mund të operojnë sipas Prigozhin, cdo sistem ushtarak me sukses qoftë ai sovjetik apo i NATO-s. “Unë mund të jap një gjykim bazuar në eksperiencën time. Unë e di se vendet luftojnë në mënyra të ndryshme. Sot, Vagner është ushtria më e mirë në botë dhe pas saj, sigurisht që unë do të them se duhet të jetë ushtria ruse, për të qenë politikisht korrekt. Por, nuk është kështu. Unë besoj se ukrainasit sot janë një nga ushtritë më të forta në botë”, tha Prigozhin. Gjatë fundjavës, Vagner tha se kishte marrë të gjitha territoret që kishte patur në plan dhe se do të largohej nga vija e frontit në ukrainën lindore më 25 maj, duke ia lënë luftimet në dorë ministrisë ruse të mbrojtjes. Prigozhin ka kritikuar lidershipin e ushtrisë ruse në të shkuarën, madje edhe më herët këtë muaj, kur fajësoi shefat e mbrojtjes për dhjetëra e mijëra humbje mes trupave të tij, për faktin se nuk kishin patur municione të mjaftueshme. Në intervistë, Prigozhin tha se më shumë se 10 mijë trupa të Vagnerit kishin humbur jetën në betejën për Bahmutin. Ai pranoi ndërkohë se rusia nuk kishte arritur sukses në qëllimin e saj për demilitarizimin e Ukrainës. “Në fillim të luftës, ukraina kishte maksimumi 500 tanke. Tani ka 5 mijë. Vetëm 20 mijë trupa dinin si të luftonin në fillim, tani janë 400 mijë ata që dijnë të luftojnë. Pra a e kemi cmilitarizuar ne ukrainën...Duket se jo, kemi bërë të kundërtën. Ne e kemi militarizuar atë”.