Rusia është e gatshme të veprojë si ndërmjetëse në konfliktin mes Izraelit dhe Iranit, dhe propozimi i mëparshëm i Moskës për të ruajtur uraniumin iranian në Rusi mbetet në tryezë, tha Kremlini të hënën. Teherani thotë se ka të drejtë për energji bërthamore paqësore, por programi i tij i pasurimit të uraniumit që përparon me shpejtësi ka ngjallur frikë në Perëndimin e më gjerë, si edhe në të gjithë Gjirin, se vendi dëshiron të zhvillojë armë bërthamore. Para se Izraeli të niste sulme ndaj Republikës Islamike, Rusia tha se ishte e gatshme të pranontë uraniumin e pasuruar shumë nga Irani dhe ta shndërronte atë në karburant reaktori civil si një mënyrë e mundshme për të qetësuar krizën. "Ky propozim mbetet në tryezë, mbetet i rëndësishëm. Por, sigurisht, me shpërthimin e luftës, situata është komplikuar", tha zëdhënësi i Kremlinit Dmitry Peskov. Presidenti amerikan Donald Trump shprehu optimizëm të dielën se paqja do të vinte së shpejti dhe përmendi mundësinë që Presidenti rus Vladimir Putin të ndihmonte. Rusia, tha Peskov, mbetet e gatshme të ndërmjetësojë nëse do të jetë e nevojshme, por ai vuri në dukje se shkaqet rrënjësore të konfliktit duheshin adresuar dhe eliminuar, dhe se sulmet ushtarake po e përshkallëzonin krizën përtej cdo niveli të arsyeshëm.