Malbor Luzi është dënuar me dy vite burg nga autoritetet britanike, pasi u kap pak kohë më parë duke u kujdesur për rritjen dhe kultivimin e bimëve narkotike, brenda një ‘shtëpie bari’ në Angli. 33-vjeçari shqiptar, u kap në një shtëpi, në dhomat e të cilës u gjetën 489 bimë narkotike dhe vlera e tyre shkonte deri në 268,950 paund. Ai u arrestua në flagrancë më 20 tetor të këtij viti në Leeds. Shtëpia e barit ishte e pajisur me mjete të sofistikuara për ngrohje, ndriçim dhe rritje të lëndës narkotike. Në momentin e arrestimit, shqiptarit iu gjet një celular, para, si dhe një kartë identiteti. 33-vjeçari, pa adresë fikse, pasi u intervistua pretendoi se ishte kërcënuar nga të tjerë që e urdhëruan të kujdesej për bimët. Malbor Luzi tha gjithashtu se ai kishte qenë përgjegjës vetëm për ujitjen e bimëve. Ai u deklarua fajtor për prodhimin e kanabisit dhe u burgos për dy vjet.