Në fjalimin e parë të mbajtur për vitin 2024-, Ministri i Jashtëm Turk, Hakan Fidan deklaroi se zbutja e tensioneve në Egje dhe përmirësimi i marrërdhënieve me Greqinë, do të zërë një vend të rëndësishëm në diplomacinë e vendit. “Ne i kushtojmë rëndësi edhe atmosferës pozitive me Greqinë në kuadër të uljes së tensionit në Egje. Kjo redukton presionin mbi Evropën dhe mbi Bashkimin Evropian, si dhe redukton tensionet”, u shpreh Fidan. Ministri i Jashtëm turk foli edhe për liberalizimin e vizave të turqve, duke e rendituar gjithashtu si një ndër prioritetet qeverisëse për 2024-ën. “Kjo është një çështje e rëndësishme, për të cilën po punojmë. Së pari, ne u fokusuam në lehtësimin e kufizimeve të vizave, por për të arritur liberalizimin total të vizave, duhet të diskutojmë çështje serioze. Aktualisht jemi duke punuar në dy çështje: liberalizimin e vizave dhe përditësimin e bashkimit doganor. Kemi bashkëpunim serioz për emigracionin, pasi është i rëndësishëm, si për ne ashtu edhe për ata”, tha Fidan. Ministri turk njoftoi gjithashtu se javën e ardhshme homologu i tij amerikan, Antony Blinken do të zbarkojë për nëj vizitë zyrtare në Ankara, ku ndër të tjera pritet të diskutohet edhe shitja e avionëve F-16 nga SHBA-të te Turqia.