Një avion ushtarak kolumbian u rrëzua në një katastrofë gjatë ngritjes të hënën, duke vrarë 66 persona, ndërsa ekipet e shpëtimit transportuan dhjetëra të mbijetuar në spitalet aty pranë dhe nisën kërkimet për katër peresona që ende ishin të zhdukur, sipas një zyrtari të lartë. Aeroplani transportues Hercules C-130 i ndërtuar nga Lockheed Martin mbante 128 persona në bord, përfshirë 11 pjesëtarë të Forcave Ajrore, 115 trupa të ushtrisë dhe dy oficerë të policisë kombëtare. Numri i të vdekurve ishte pothuajse dyfishi i shifrës së mëparshme të dhënë nga autoritetet, që vazhduan përpjekjet e kërkimit në vendin e rrëzimit. Aksidenti ndodhi ndërsa avioni po ngrihej nga Puerto Leguizamo, në kufirin me Perunë, tha Ministri i Mbrojtjes Pedro Sanchez në X. Besohet se avioni është përplasur pranë fundit të pistës ndërsa po ngrihej, me një krah të tij që më pas u përplas me një pemë. Përplasja bëri që avioni të merrte flakë dhe të shpërthente. Banorët e zonës ishin të parët që ndihmuan të mbijetuarit, me video që tregonin njerëz që vraponin në një rrugë dhe me njerëz të plagosur në motoçikletat e tyre.