Kryetari i fuqishëm i parlamentit të Iranit, Mohammad Baqer Qalibaf, që disa media e kanë identifikuar si bashkëbiseduesin e Trumpit, tha se nuk kishte pasur negociata me SHBA-në për t’i dhënë fund luftimeve. "Nuk janë zhvilluar negociata me SHBA-në dhe lajmet e rreme që po jepen po përdoren për të manipuluar tregjet financiare dhe ato të naftës si edhe për t'i shpëtuar moçalit në të cilin janë bllokuar SHBA-ja dhe Izraeli", shkroi ai në X. Garda Revolucionare të Iranit tha se po niste sulme të reja ndaj objektivave të SHBA-së dhe i përshkroi fjalët e Trumpit si "operacione psikologjike" që nuk kishin ndikim në luftën e Teheranit. Trump u tha gazetarëve se i dërguari i tij special Steve Ëitkoff dhe dhëndri Jared Kushner, të cilët kishin negociuar me Iranin para luftës, kishin zhvilluar diskutime me një zyrtar të lartë iranian deri në mbrëmjen e së dielës dhe do të vazhdonin të hënën. "Kemi pasur bisedime shumë, shumë të forta. Do të shohim se ku do të çojnë ato", tha ai të hënën. Një zyrtar evropian tha se, ndërsa nuk kishte pasur negociata të drejtpërdrejta mes dy vendeve, Egjipti, Pakistani dhe shtetet e Gjirit po përcillnin mesazhe. Një zyrtar pakistanez dhe një burim i dytë i thanë Reuters se bisedimet e drejtpërdrejta për përfundimin e luftës mund të mbahen në Islamabad që këtë javë. Zyrtari pakistanez tha se zëvendëspresidenti amerikan JD Vance, si dhe Ëitkoff dhe Kushner, pritet të takohen me zyrtarë iranianë në Islamabad këtë javë, pas një telefonate mes Trump dhe shefit të ushtrisë së Pakistanit Asim Munir. Shtëpia e Bardhë konfirmoi telefonatën e Trump me Munirin. Zyra e kryeministrit pakistanez nuk iu përgjigj menjëherë kërkesave për koment. Media iraniane raportoi ndërkohë se Presidenti i Iranit Masoud Pezeshkian dhe kryeministri pakistanez Shehbaz Sharif diskutuan për ndikimin e luftës në sigurinë rajonale dhe atë globale. "Nëse palët dëshirojnë, Islamabadi është gjithmonë i gatshëm të presë bisedime. Ai ka mbështetur vazhdimisht dialogun dhe diplomacinë për të promovuar paqen dhe stabilitetin në rajon", tha Tahir Andrabi, një zëdhënës i ministrisë së jashtme të Pakistanit. Edhe pse nuk pati konfirmim të menjëhershëm se bisedimet kishin ndodhur siç u përshkrua nga Trump, ministria e jashtme e Iranit përmendi nisma për të ulur tensionet. Ajo tha se Ministri i Jashtëm i Iranit, Abbas Araqchi, kishte shqyrtuar zhvillimet që lidhen me Ngushticën e Hormuzit me homologun e tij nga Omani dhe kishte rënë dakord të vazhdonte konsultimet midis dy vendeve.