Në anketën periodike të punësimit, INSTAT raportoi një rënie të papërfillshme të papunësisë në ekonominë e vendit, por një ulje të punësimit në dy sektorë jetikë të saj. Sipas INSTAT shkalla e punësimit në bujqësi ra me 3 për qind, ndërsa në atë të industrisë me 2 për qind. Rënia në këta dy sektorë është kompensuar me rritjen e fortë në sektorin e shërbimeve, ku u raportua rritje me mbi 6 për qind në periudhën korrik-shtator të këtij viti në krahasim me të njëjtën periudhë të vitit të kaluar. Tremujori përkon me kulmin e sezonit turistik dhe nevojën e bizneseve të sektorit të shërbimit, sidomos në bregdet për fuqi punëtorë. Në tremujorin e tretë 2023, shkalla zyrtare e papunësisë në Shqipëri rezulton të jetë 10,5 për qind, me një ulje të papërfillshme në krahasim me tremujorin e dytë të këtij viti. Sipas Instat, shkalla e punësimit të të rinjve është 44,8 për qind. Krahasuar me të njëjtën periudhë të vitit të kaluar, shkalla e punësimit të të rinjve është rritur me 1,1 pikë përqindje.