Teksa lufta mes Rusisë e Ukrainës vijon, në një tentative që kjo e fundit të rimarrë trojet e pushtuara nga forcat e Putinit, njëherësh ndihmat perëndimore në armatim vijojnë. Por krahas kësaj, Ukraina ka rritur prodhimin e dronëve. Ky hap është marrë gjatë një viti pasi Rusia nisi pushtimin, tha kryeministri Denys Shmyhal. Sipas autoriteteve ukrainase 200 kompani kanë nisur prodhimin e dronëve të rinj luftues. “Tani progresi i dronëve nga zhvillimi i tyre deri te blerja është shumë i shkurtër”, tha Shmyhal. Ai shtoi se industria ukrainase e mbrojtjes ka ndryshuar qasjen në mënyrë radikale dhe se kompania shtetërore e prodhimit të armëve, Ukroboronprom, është modernizuar. Vlen të theksohet fakti se që me nisjen e pushtimit të Ukrainës në shkurtin e vitit 2022, drone janë kthyer në një prej armëve kryesore në fushën e betejës. Teksa Ukraina fillimisht varej nga dronët e prodhuar nga kompania turke, Bayraktar, Rusia më vonë nisi të përdorte dronët iranianë, Shahed. Po ashtu, Ukraina ka shpeshtuar sulmet me drone gjatë muajve të fundit në territorin e Rusisë, teksa kjo lë të kuptojë se Ukraina tani po prodhon dronë me rreze më të gjatë veprimi edhe pse sasia e eksplozivëve që bartin ende mbetet e vogël.