Nuk ka shenja të jashtme nervozizmi, të paktën ende jo: njerëzit në Svalbard vazhdojnë jetën e tyre të përditshme si normalisht pavarësisht spekulimeve se ky arkipelag norvegjez mund të jetë territori i ardhshëm arktik i lakmuar nga Shtetet e Bashkuara ose Rusia. "Sot Groenlanda, nesër Svalbardi?" -- Terje Aunevik, kryebashkiak i qytetit kryesor të Svalbardit, Longyearbyen, thotë se i është bërë kjo pyetje shumë herë. Ambiciet ekspansioniste të Presidentit amerikan Donald Trump, e kanë kthyer vëmendjen globale në Arktik, ku po rriten rreziqet gjeo-strategjike dhe financiare. "Arktiku nuk është më një cep i qetë në hartë", tha diplomatja më e lartë e Bashkimit Evropian, Kaja Kallas, në një konferencë në Tromso në veri të Norvegjisë në fillim të shkurtit. "Është vija e parë e konkurrencës globale të energjisë". Longyearbyen është një vend i pazakontë. Një ish-komunitet minierash i shndërruar në destinacion turistik dhe pikë e nxehtë akademike, ai shtrihet në rajonin me ngrohjen më të shpejtë në planet.