Shtetet e Bashkuara kanë kërkuar që NATO të përqendrohet në rolin e saj tradicional mbrojtës dhe të reduktojë angazhimet jashtë territorit euroatlantik. Sipas Politico, katër diplomatë të aleancës ushtarake kanë konfirmuar se Uashingtoni ka shtuar presionin muajt e fundit për rishikimin e disa misioneve kyçe, përfshirë edhe tërheqjen e rreth 2,500 trupave nga Iraku në kuadër të një marrëveshjeje të mëhershme me qeverinë irakiane Sipas diplomatëve, brenda aleancës ka qëndrime të ndryshme, ku disa vende janë të hapura për zvogëlim gradual të pranisë, por jo për një tërheqje të menjëhershme të trupave. Po ashtu, zyrtarët e NATO-s kanë bërë të ditur se SHBA-ja ka ngritur diskutime të hershme për reduktimin e misionit paqeruajtës të NATO-s në Kosovë, KFOR, i cili funksionon që nga viti 1999 dhe aktualisht ka rreth 4,500 trupa. Diplomatët theksojnë se çdo vendim për misionet, kërkon miratimin unanim të 32 shteteve anëtare.