Të paktën tre persona u vranë dhe disa të tjerë u plagosën nga bombardimet e lëshuara nga forcat ruse në kryeqytetin ukrainas të Kievit të enjten, thanë autoritetet. Pas një serie të raportuar prej 17 sulmesh me dronë dhe raketa në kryeqytetin ukrainas gjatë muajit maj, forcat ruse e filluan muajin e qershorit duke vazhduar sulmet në kryeqytet që në orët e para të mëngjesit të së enjtes. Administrata e qytetit të Kievit raportoi se një fëmijë ishte në mesin e të vdekurve dhe 10 persona tjerë u plagosën. Sulmi dëmtoi gjithashtu ndërtesa banimi, një klinikë mjekësore, një tubacion uji dhe makina. Shtabi i Përgjithshëm i Ukrainës raportoi se Forcat Ajrore penguan 10 raketa, të cilat i identifikuan si raketa balistike Iskander me rreze të shkurtër veprimi. Rusia ka shënjestruar vazhdimisht Kievin me valë sulmesh me dronë dhe raketa që nga fillimi i pushtimit, por sulmet kundër kryeqytetit janë intensifikuar gjatë muajit të kaluar, ndërsa Ukraina përgatitet për një kundërofensivë. Mbrojtja ajrore e Ukrainës është bërë gjithnjë e më efektive në përgjimin dhe rrëzimin e dronëve dhe raketave ruse, por mbetjet e raketave që shkatërrohen në qiell, mund të shkaktojnë zjarre dhe të lëndojnë njerëz poshtë. Pasi një grua u vra duke parë një sulm ajror nga ballkoni i saj në fillim të kësaj jave, autoritetet e Kievit u kërkuan banorëve të dëgjonin sirenat paralajmëruese dhe të qëndronin në strehimore ose vende të tjera të sigurta.