Një ujk që u arratis nga një kopsht zoologjik në Korenë e Jugut mbetet i lirë, thanë autoritetet, duke bërë që një shkollë lokale të mbyllet për shkak të shqetësimeve për sigurinë, ndërsa kërkimi vazhdon. Ujku u largua nga një kopsht zoologjik në një park argëtues në Daejeon, rreth 150 kilometra në jug të Seulit, të mërkurën, duke ndezur një operacion kërkimi në zonat përreth. Më shumë se 300 persona - përfshirë zjarrfikës, oficerë policie dhe trupa ushtarake, po marrin pjesë në operacionin e kërkimit, tha një zyrtar nga Shtabi i Zjarrfikësve Daejeon. "Ne ngritëm dronë me kamera herët në mëngjes, por na u desh t'i tërhiqnim për shkak të shiut të vazhdueshëm", thanë zyrtarët. Ujku gërmoi në tokë dhe kaloi gardhin e kopshtit zoologjik, përpara se të arratisej, sipas zyrtarëve. Imazhet e publikuara nga mediat lokale e treguan atë duke bredhur në një rrugë. Në vitin 2023, një zebër u bë sensacion global pasi u arratis nga një kopsht zoologjik në Seul dhe u pa duke bredhur nëpër rrugë. Zebra, e quajtur Sero, u bllokua përfundimisht në një rrugicë, u godit me qetësues dhe u kthye në kopshtin zoologjik pa asnjë lëndim.