Udhëheqësi suprem i Iranit, Mojtaba Khamenei, tha në mesazhin e tij të fundit të shkruar se republika islamike nuk dëshiron luftë me Shtetet e Bashkuara dhe Izraelin, por do të mbrojë të drejtat e saj si komb, raportoi televizioni shtetëror. "Ne nuk kërkuam luftë dhe nuk e duam atë," tha ai në mesazhin e lexuar në televizionin shtetëror, disa javë pasi babai i tij, Ajatollah Ali Khamenei, u vra në ditën e parë të luftës. "Por ne nuk do të heqim dorë nga të drejtat tona legjitime në asnjë rrethanë, dhe në këtë drejtim, ne e konsiderojmë të gjithë frontin e rezistencës si një të tërë," shtoi ai, në një referencë të dukshme për Libanin ku Izraeli po lufton me aleatin e Teheranit, Hezbollahun. Por Khamenei i ri kërkoi "paratë e gjakut" nga SHBA dhe Izraeli, pasi i denoncoi ata si "agresorë". "Ne padyshim do të kërkojmë kompensim për çdo dëm të shkaktuar, paratë e gjakut të martirëve të luftës", tha Ajatollahu. Irani këtë javë ra dakord për një armëpushim të brishtë dyjavor me Shtetet e Bashkuara që mund të çojë në negociata paqeje pas kërcënimeve për asgjësim nga Presidenti i SHBA-së Donald Trump. Khamnei u tha iranianëve se ata "nuk duhet të imagjinojnë se dalja në rrugë nuk është më e nevojshme" pavarësisht njoftimit të armëpushimit. "Zërat tuaj në sheshet publike padyshim që kanë ndikim në rezultatin e negociatave", tha ai, sipas mesazhit të transmetuar në televizionin shtetëror. Me shumë gjasa i plagosur në sulmin që vrau të atin, Mojtaba Khamenei, ende nuk është parë në publik që nga emërimi i tij si lider suprem. Ai ka lëshuar deklarata me shkrim, shumica e të cilave janë lexuar nga prezantuesit në televizionin shtetëror. Presidenti amerikan Donald Trump madje ka spekuluar se ai mund të jetë i vdekur, por televizioni shtetëror iranian thotë se ai po shërohet nga plagët e tij dhe poston foto të tij, pa specifikuar se kur janë bërë ato.