Ukraina vazhdon të çojë përpara inkursionin e vet në rajonin kufitar rus të Kurskut dhe tani kontrollon qindra kilometra katrorë të territorit, por me veprimet e saj synon të krijojë një zonë neutrale dhe jo të pushtojë toka ruse, thotë lidershipi i vendit. Presidenti ukrainas, Volodymyr Zelensky, tha një ditë më parë se forcat ukrainase kanë marrë kontrollin e 92 vendbanimeve në rajonin e Kurskut në Rusi dhe tani kontrollojnë më shumë se 1.250 kilometra katrorë tokë në rusi, në vetëm dy javë nga fillimi i inkursionit të befasishëm në anën tjetër të kufirit. Një nga këshilltarët më të lartë të Zelenskit, Mykhaylo Podolyak, tha për Current Time se ndryshe nga pushtimi i paprovokuar i Rusisë në Ukrainë, operacioni i Kievit ka një synim të qartë, dhe është në përputhje me legjislacionin ndërkombëtar, por edhe mbron popullatën civile.