Instituti Kombëtar i Shëndetësisë Publike të Kosovës ka bërë të ditur se uji në fshatin Drenoc në Komunën e Deçanit është i papijshëm, pasi në ujëmbledhësin atje janë gjetur vlera të shtuara të baktereve koliforme. Qytetarë të shumtë nga rajoni i Deçanit, që nga fundjava e kaluar, janë duke raportuar simptoma të helmimit. Komuna ka shpallur gjendje emergjente pasi shkaktari nuk është përcaktuar ende. IKSHPK është duke kryer analiza të vazhdueshme të ujit, ndërsa disa mostra të pacientëve të helmuar është thënë se do të dërgohen për testim jashtë Kosovës. Deçani furnizohet me ujë nga ujësjellësi rajonal “Hidrodrini” që funizon me ujë edhe komunat: Pejë, Istog, Klinë dhe Junik. Në një deklaratë më 13 korrik, “Hidrodrini” ka porositur qytetarët që furnizohen nga ky ujësjellës, që të mos kenë dyshime në cilësinë e ujit.