Të paktën 30 persona kanë humbur jetën në Pekin dhe më shumë se 80,000 janë evakuuar në vende të sigurta, thanë autoritetet kineze, ndërsa shirat e rrëmbyeshëm dhe përmbytjet kanë shkatërruar rrugët dhe shtëpitë në Kinën veriore. Tetë persona të tjerë humbën jetën pas një rrëshqitjeje dheu të hënën në qytetin Chengde, rreth tre orë në verilindje të Pekinit. Kina po përballet me një verë me mot ekstrem. Valë të nxehta rekord goditën rajonin lindor të vendit në fillim të këtij muaji, ndërsa përmbytjet përfshinë jugperëndimin e vendit. Në sfondin e përmbytjeve masive në Kinën veriore, Presidenti Xi Jinping ka bërë thirrje për përpjekje shpëtimi "të gjithanshme" dhe u ka thënë autoriteteve të përgatiten për "skenaret më të këqija dhe më ekstreme". "Asnjë përpjekje nuk duhet kursyer për të kërkuar dhe shpëtuar të zhdukurit ose të bllokuarit, për të transferuar dhe zhvendosur banorët në zonat e prekura dhe për të zvogëluar bilancin e viktimave në maksimum", tha presidenti. Autoritetet kineze kanë ndarë 200 milionë juanë ose 28 milionë dollarë, për përpjekjet e rimëkëmbjes, duke përfshirë riparimin e rrjetit të transportit dhe infrastrukturës tjetër. Periferia e Pekinit u godit më rëndë nga shiu i rrëmbyeshëm. Përmbytjet kanë dëmtuar dhjetëra rrugë dhe kanë ndërprerë energjinë elektrike në më shumë se 130 fshatra. Videot tregojnë ekipet e shpëtimit që kalojnë nëpër ujërat e përmbytjeve deri në gjoks për të arritur te banorët e bllokuar, si dhe helikopterë dhe dronë që transportojnë ushqim dhe ndihma të tjera në zonën e fatkeqësisë.