Një gjykatë në Siri ka lëshuar një urdhër-arresti në mungesë ndaj ish-presidentit Bashar al-Assad, sipas agjencisë shtetërore të lajmeve SANA, e cila citon kryetarin e gjykatës. Sipas burimit, urdhri lidhet me akuzat për krime të rënda të kryera gjatë ngjarjeve të vitit 2011 në Daraa, përfshirë vrasje të qëllimshme, torturë me pasojë vdekjen dhe privim të paligjshëm nga liria. Padia është ngritur nga të afërm të viktimave të asaj periudhe. Gjykatësi deklaroi se ky vendim “hap rrugën për ndjekje penale ndërkombëtare” ndaj Assadit. Protestat kundër regjimit në Daraa në vitin 2011 shënuan fillimin e konfliktit sirian, ku shumë civilë humbën jetën si pasojë e shtypjes së dhunshme nga forcat qeveritare. Situata eskaloi në luftë të armatosur dhe solli përfshirjen e grupeve terroriste. Pas rrëzimit të tij nga pushteti disa muaj më parë, Assad është larguar nga Siria dhe aktualisht ndodhet në Moskë, Rusi.