Sezoni turistik këtë vit ka regjistruar shifra shumë të larta krahasuar me një vit më parë. Megjithatë edhe pse ka patur një fluks të lartë, si në hyrje ashtu edhe në dalje në pikat e kalimit kufitar tokësore dhe detare, nuk janë krijuar radhë, pasi policia kufitare ka shtuar sportelet dhe stafin. Referuar shifrave nga maji deri në korrik, turistët më të shumtë kanë ardhur nga Kosova. Nga shteti fqinj kanë hyrë 1.5 milion pushues në total. Pas tyre vijnë italianët pasuar nga turistët nga Mali i Zi dhe Maqedonia e Veriut. Përpos masave në kufi, policia e shtetit në bashkëpunim me institucione të tjera është koordinuar për të mos pasur incidente me turistët. Mësohet se ka pasur 85 raste të dhënies ndihmë në det ku situata ka qenë vërtet kritike. Probleme ka pasur në Karaburun dhe në disa zona malore. Sakaq policia kufitare ka ndëshkuar dhe krimet ndërkufitare ku ka arrestuar disa persona për mosdeklarim të të ardhurave në kufi dhe tentativë për trafik të lëndëve narkotike.