Prokuroria e Posaçme paraqiti në seancën e kësaj të hënë listën me 40 dëshmitarë të cilët kërkon të thirren në procesin gjyqësor “Metamorfoza”, ku të pandehur janë shtetasit Pëllumb Gjoka, Behar Bajri dhe Edmond Preka. Në mesin e personave, janë edhe ata që janë pyetur më herët nga prokuroria e Shkodrës. Sipas organit të akuzës, këta persona do të dëshmojnë për vrasjen e shtetasit Gjin Ndoj, tentativën e vrasjes ndaj ish oficerit të burgjeve, Kleanth Musabelli. Ata do të pyeten për sqarimin e rrethanave të ngjarjes dhe për episodet për të cilat akuzohen të pandehurit në ketë proces. Organi i akuzës lexoi edhe provat shkresore. Mbrojtësit ligjorë të Pëllumb Gjokës debatuan me përfaqësuesit e akuzës në lidhje me bisedat në aplikacionin Sky Encrochat, ku flitet për momentin e vrasjes së Gjin Ndoj në vitin 2020, ku sipas avokatëve ka një mospërputhje të orarit mes bisedave që shkëmbehen në aplikacion dhe momentit të vrasjes. Avokatët e kanë cilësuar si manipulim procesverbalin, gjë që u kundërshtua nga prokuroria, e cila argumentoi se orari i serverave të Sky, nuk është i njëjtë me orën lokale në vendin tonë. Avokatët kërkuan kohë të njihen me provat e SPAK, për këtë arsye GJKKO caktoi seancën e radhës në datë 3 mars ora 14.00.