Ndërhyrja ligjore e Edi Ramës për të mos lejuar pezullimin e ministrave nga gjyqësori, konsiderohet nga opozita ndërhyrje politike për të dobësuar hetimin dhe për të krijuar një imunitet të ri për pushtetin. Kryetari i grupit parlamentar të Partisë Demokratike, Gazment Bardhi kujton se në vendet e Bashkimit Europian, ku Shqipëria synon të shkojë, zyrtarët e hetuar nuk ndryshojnë ligjin, por japin dorëheqjen. “Ligji është i qartë: pezullimi nga detyra është masë e parashikuar në Kod. Ai nuk shkarkon ministrin, nuk paralizon shtetin, nuk prek institucionin. Ndalon përkohësisht personin nën hetim të ushtrojë funksionin, për të mbrojtur procesin penal. Të thuash se “pezullohet funksioni” është deformim i qëllimshëm. Gjykata nuk pezullon qeverinë. Pezullon një individ nga ushtrimi i detyrës. Në BE dhe në SHBA, kur një zyrtar përfshihet në hetim për korrupsion, ai largohet. Jep dorëheqjen. Nuk ndryshon ligjin për të mbrojtur veten, siç po bën Edi Rama.” Bardhi bën thirrje që këshilli për mandatet të mblidhet pa vonesa për të shqyrtuar kërkesën e SPAK sa i takon heqjes së imunitetit të Belinda Ballukut.