Sipas garancive të sigurisë që i janë ofruar ukrainës nga Shtetet e Bashkuara dhe Evropa, në rast të një marrëveshjeje paqeje me Rusinë, paqeruajtësit mund të sprapsin forcat ruse në rrethana të caktuara, tha kancelari gjerman Friedrich Merz në një intervistë për televizionin publik ZDF, duke shtuar se kjo mbetet sidoqoftë një perspektivë e largët. I pyetur nga intervistuesit për detaje mbi garancitë e mundshme të sigurisë të paraqitura nga Shtetet e Bashkuara në bisedimet e së hënës në Berlin me presidentin ukrainas Volodymyr Zelenskyy, Merz tha se garantuesit do të duhet të sprapsin forcat ruse nëse do të ketë shkelje të ndonjë kushti të armëpushimit. "Ne do të siguronim një zonë të demilitarizuar midis palëve ndërluftuese dhe, për të qenë më specifik, ne gjithashtu do të vepronim kundër inkursioneve dhe sulmeve përkatëse ruse. Por ne nuk jemi ende atje," tha ai. “Fakti që amerikanët kanë marrë një angazhim të tillë, për të mbrojtur Ukrainën në rast të një armëpushimi sikur të ishte territor i NATO-s, mendoj se është një pozicion i ri, i jashtëzakonshëm për Shtetet e Bashkuara të Amerikës”, tha Merz. Presidenti ukrainas, Volodimir Zelenski ka thënë se propozimet e negociuara me zyrtarët amerikanë për një marrëveshje paqeje për t'i dhënë fund luftës së Rusisë në Ukrainë mund të finalizohen së shpejti, e pas kësaj do ti paraqiten Kremlinit nga të dërguarit amerikanë. Pas dy ditësh bisedime në Berlin, zyrtarët amerikanë thanë se kishin zgjidhur “90%” të çështjeve problematike mes Rusisë dhe Ukrainës, por pavarësisht kthesës pozitive, nuk është e qartë nëse fundi i luftës është afër, veçanërisht pasi pala ruse mungon në bisedimet aktuale.