Presidenti amerikan Donald Trump, tha se kishte urdhëruar byronë federale të Burgjeve që të rindërtonte dhe rihapte burgun famëkeq të Alcatrazit në Gjirin e San Franciskos për të "dërguar atje shkelësit më të pamëshirshëm dhe të dhunshëm të Amerikës". "Rindërtoni dhe hapni Alcatrazin!" shkroi ai në platformën Truth Social. "Kur ishim një Komb më serioz, në të kaluarën, nuk hezitonim të burgosnim kriminelët më të rrezikshëm dhe t'i mbanim larg kujtdo që mund të dëmtonin”, tha ai. Burgu federal në Alcatraz strehonte kriminelë famëkeq amerikanë si Al Capone para se të mbyllej në vitin 1963. Tani është një nga destinacionet turistike më të njohura të San Franciskos. "Sot, po i kërkoj Byrosë së Burgjeve, së bashku me Departamentin e Drejtësisë, FBI-në dhe Sigurinë Kombëtare, që të rihapin një ALCATRAZ të zgjeruar dhe të rindërtuar në mënyrë të konsiderueshme", shkroi Trump. Ai i tha gazetarëve ndërsa kthehej në Shtëpinë e Bardhë nga Florida, se rihapja e burgut ishte vetëm një ide që ai e ka pasur prej kohësh. "Është një simbol i ligjit dhe rendit," tha ai. Alcatraz u reklamua si burgu më i sigurt i Amerikës duke pasur parasysh vendndodhjen në një ishull, në mes të ujërave të akullta dhe rrymave të forta. Asnjë arratisje e suksesshme nuk është regjistruar zyrtarisht nga Alcatrazi, megjithëse pesë të burgosur janë të listuar si "të zhdukur dhe të supozuar të mbytur". Alcatraz u mbyll sepse ishte shumë i kushtueshëm për të vazhduar funksionimin, sipas faqes së internetit të Byrosë Federale të Burgjeve, kryesisht për shkak të vendndodhjes së tij në ishull. Ishte pothuajse tre herë më i kushtueshëm për t'u operuar sesa çdo burg tjetër federal, thuhet në faqen e internetit të byrosë.