Presidenti i SHBA-së, Donald Trump, mbajti një fjalim drejtuar kombit mbi luftën, i cili sipas analizave të mediave ndërkombëtare si BBC dhe CNN, ishte kryesisht një përsëritje e qëndrimeve të tij të ditëve të fundit. Fjalimi i tij u duk i mjegulluar, pasi nuk solli qartësi mbi strategjinë amerikane dhe hapin e radhës në konfliktin që është përfshirë. Një nga pikëpyetjet kryesore mbetet qëndrimi i aleatit të palëkundur, Izraelit. Ende nuk është e qartë nëse qeveria e kryeministrit Benjamin Netanyahu është në një linjë me planin apo afatet e përmendura nga Trump. Po ashtu, pa përgjigje mbetet edhe çështja e uraniumit të pasuruar iranian, i cili sipas deklarimeve të mëparshme ishte asgjësuar pas përplasjes së vitit të kaluar. Megjithatë, Trump foli për Ngushticën e Hormuzit, duke deklaruar se ajo pritet të rihapet natyrshëm pas përfundimit të konfliktit, por pa dhënë detaje konkrete mbi mënyrën se si do të arrihet kjo. Në përfundim, pavarësisht një fjalimi rreth 20-minutësh, mbetet e paqartë se çfarë konsideron administrata amerikane si fitore në këtë luftë apo cilat janë skenarët në tavolinë. Analistët theksojnë se, duke pasur parasysh qëndrimet shpesh kontradiktore të Trump nga dita në ditë, situata mund të ndryshojë në çdo moment.