Lufta në Iran po rezulton jashtëzakonisht e kushtueshme për Shtetet e Bashkuara, me miliarda dollarë të shpenzuara që në javët e para të konfliktit. Vetëm gjashtë ditë pas nisjes së operacioneve muajin e kaluar, Pentagoni informoi ligjvënësit se kostoja kishte arritur në rreth 11.3 miliardë dollarë. Me zgjatjen e luftës, edhe shpenzimet ditore kanë pësuar luhatje. Sipas zyrtarëve amerikanë, kostot janë ulur disi për shkak të dobësimit të sistemeve mbrojtëse të Iranit, duke bërë që operacionet të jenë më pak të kushtueshme krahasuar me fazat e para të sulmeve. Megjithatë, ekspertët paralajmërojnë se konflikti vijon të ketë një kosto shumë të lartë, duke vlerësuar se SHBA-ja po shpenzon mesatarisht rreth 385 milionë dollarë në ditë. Kjo shifër pritet të mbetet e lartë për sa kohë që operacionet ushtarake vazhdojnë në terren. Për pasojë, përfshirja e SHBA-ve në këtë luftë është shoqëruar me debate të forta politike dhe strategjike, sidomos pas deklaratave të presidentit Donald Trump për një qasje më agresive ndaj Iranit dhe madje edhe pas deklaratave për tërheqjen nga NATO. Kostoja ekonomike, bashkë me rreziqet për përshkallëzim, po shton presionin mbi administratën amerikane për të justifikuar vazhdimin e operacioneve, në një kohë që nuk ka ende qartësi se cilat janë objektivat e realizuara.