Administrata Trump po planifikon t'u tregojë aleatëve të NATO-s këtë javë se do të zvogëlojë kapacitetet ushtarake që SHBA do të kishte në dispozicion për të ndihmuar vendet evropiane të aleancës, në rast të një krize, thanë tre burime të njohura me çështjen. Sipas një kuadri të njohur si Modeli i Forcës së NATO-s, vendet anëtare të aleancës identifikojnë një grup forcash në dispozicion që mund të aktivizohen gjatë një konflikti ose çdo krize tjetër të madhe, siç është një sulm ushtarak ndaj një anëtari të NATO-s. Ndërsa përbërja e saktë e këtyre forcave të kohës së luftës është një sekret i ruajtur me kujdes, Pentagoni ka vendosur të zvogëlojë ndjeshëm angazhimin e tij, thanë burimet. Presidenti amerikan Donald Trump e ka bërë të qartë se pret që vendet evropiane të marrin përsipër përgjegjësinë kryesore për sigurinë e kontinentit. Mesazhi për aleatët këtë javë është një shenjë konkrete e zbatimit të kësaj politike. Disa detaje mbeten të paqarta, si psh sa shpejt Pentagoni planifikon të transferojë përgjegjësitë e gjendjes së krizës tek aleatët evropianë. Megjithatë, burimet thanë se Pentagoni planifikon të njoftojë qëllimin e tij për të zvogëluar angazhimin në një takim të shefave të politikave të mbrojtjes që do të mbahet të premten në Bruksel.