Protesta e fermerëve vijojnë anekënd Europës, e tashmë janë afruar më pranë vendit tone. Bëhet fjalë për vendin fqinj jugor, Greqi, ku fermerët shprehen të vendosur që të martën të zbarkojnë në Athinë. Fermerët kanë paralajmëruar se të martën do të zbresin në kryeqytetin helen nga e gjithë Greqia që t’i bëjnë të qarta qëllimet e tyre qeverisë. Mbledhja e parë e traktorëve pritet të bëhet të hënën në Kalanë e Boiotias pasi aty pritet të mbërrijnë 60 traktorë nga Thesalia. Makineritë bujqësore pritet të lëvizin edhe nga Epiri, Greqia Perëndimore dhe Kreta.