Më 22 nëntor 1989, saktësisht 32 vjet më parë, ajo ishte e para ngjarje e kronikës së zezë që kapërceu kufijtë shtetërorë të Shqipërisë. 23 persona studentë, pilotë e pedagogë humbën jetën në atë që njihet si tragjedia e Llogarasë. Në afërsi të Himarës një autobus me studentë të Institutit të Lartë Bujqësor u aksidentua. Më tej u përplasën në Vuno e Llogara edhe dy helikopterët ushtarakë, që tentuan të mbartnin për në Tiranë të plagosurit. Në datën 22 nëntor të vitit 1989 autobusi i Institutit të Lartë Bujqësor, që drejtohej nga shoferi Ali Omuri është nisur nga Himara në drejtim të qytetit të Sarandës rreth orës 13.00. Në autobus ndodheshin 3 pedagogë të asaj shkolle, 14 studentë të kursit të pemëtarisë, si dhe një ushtar pasagjer. Në orën 14:00 në afërsi të fshatit Kudhës, ku rruga është dishezë e theksuar, 100 metër para një kthese të fortë, shoferi ka bërtitur duke thënë: “U morëm në qafë”. Ndërkohë makina ka rritur së tepërmi shpejtësinë. Në kthesë shoferi nuk mundi të manovrojë, del jashtë rrugës duke bërë disa rrotullime. U shkaktua vdekja e vetë shoferit dhe e studentit Albert Smoka. Është shkaktuar dhe plagosja e personave të tjerë. Fillimisht të dëmtuarve u është dhënë ndihmë prej një reparti ushtarak aty afër e fshatarët përreth dhe janë dërguar menjëherë në spitalin e qytetit të Himarës. Prej aty është kërkuar ndihmë e specializuar mjekësore në rreth.